KFOR: Policia e Kosovës është përgjegjëse për sundimin e ligjit

KFOR, Twitter

Misioni i NATO-s në Kosovë, KFOR, ka dënuar sulmet ndaj gazetarëve që u bënë në veri një ditë më parë.

Duke bërë thirrje për përmbajtje, KFOR-i dha sqarime pse nuk u reagua në kohën kur gazetarët sulmoheshin nga huliganët në veri.

“Liria e shtypit dhe liria e shprehjes janë vlera themelore, të cilat duhet të respektohen nga të gjithë. Ne u bëjmë thirrje të gjitha palëve që të përmbahen nga dhuna ose veprimet e mëtejshme që mund të çojnë në përshkallëzim të mëtejshëm dhe të sigurojnë që mediat të mund të kryejnë punën e tyre themelore në mënyrë të sigurt”, thuhet në komunikatë, përcjell albinfo.ch.

KFOR-i thotë se është reaguesi i tretë, e se Policia e Kosovës është përgjegjëse për sigurimin e sundimit të ligjit në mbarë Kosovën.

Misioni ka bërë të ditur tutje se komandanti i KFOR-it është në kontakt të rregullt me të gjithë homologët e tij kryesorë, përfshirë përfaqësuesit e institucioneve dhe organizatave të sigurisë në Kosovë, si dhe me përfaqësues të Forcave të Armatosura të Serbisë, Misionit të BE-së për Sundimin e Ligjit (EULEX), OSBE-së dhe komunitetit diplomatik, shkruan koha.net.

Gazetarët kanë qenë cak i sulmeve nga grupet e protestuesve serbë në Leposaviq të premten.