DASH kërkon lirimin pa kushte dhe të menjëhershëm të policëve që rrëmbeu Serbia

Rrembimi i policeve kufitar patrullues te Policise se Kosoves

Departamenti Amerikan i Shtetit i ka bërë thirrje Serbisë dhe presidentit të saj, Aleksandar Vuçiq, që t’i lirojnë pa kushte dhe menjëherë tre policët e Kosovës që u kidnapuan brenda territorit të Kosovës, më 14 qershor.

Sipas Shteteve të Bashkuara të Amerikës, ata po mbahen nën akuza të pabaza.

“I bëjmë thirrje presidentit Vuçiq dhe Qeverisë së Serbisë që menjëherë dhe pa kushte të lirojnë tre policët e Kosovës, të ndaluar më 14 qershor. Arrestimi i tyre dhe vazhdimi i mbajtjes nën akuza të pabaza ka përkeqësuar situatën edhe ashtu të tensionuar. Sërish u bëjmë thirrje Serbisë dhe Kosovës që ta ndjekin planin trepikësh të propozuar nga BE-ja dhe t’i kthehen dialogut të lehtësuar nga BE-ja, pa vonesa”, thuhet në deklaratën e zëdhënësit të DASH-it, Matthew Miller, përcjell albinfo.ch.

Të mërkurën, tre policë të Kosovës u rrëmbyen nga brenda territorit të Kosovës nga forcat speciale serbe. Edhe shtetet e QUINT-it i kanë bërë thirrje menjëherë Serbisë që t’i lirojë policët.

Të premten atyre Gjykata e Lartë në Kralevë ua ka caktuar masën e paraburgimit prej 30 ditën nën akuzën për prodhim, posedim dhe trafikim të armëve dhe mjeteve plasëse, përcjell albinfo.ch.