Rreth 1.5 milionë udhëtarë kanë frekuentuar aeroportin e Prishtinës që nga fillimi i vitit. 

Zyrtarët e ANP “Adem Jashari” presin që ky fluks të arrijë në katër milionë. 

“Vetëm gjashtëmujorin e parë kemi diku 1.5 udhëtarë të proceduar përmes aeroportit ndërkombëtar të Prishtinës, për momentin kemi kapacitete të mjaftueshme deri në 4 milionë udhëtarë pothuajse. Vitin e kaluar kemi pasur afro 3 milionë udhëtarë, ndërsa këtë vit presim që ta tejkalojmë këtë numër. Ndërkaq me zgjerimin e terminalit do të kemi kapacitete deri më 5 milionë udhëtarë”, tha Valentina Gara, zëdhënëse në ANP, për “IndeksOnline”.

Sipas saj, numri më i madh i udhëtarëve vinë si zakonisht nga shtet evropiane, si Zvicra, pasohet nga Gjermania, Austria dhe vende të tjera, duke bërë që të rriten edhe kapacitetet në aeroport. 

“Do ta zgjerojmë rreth 1 mijë e 260 metra përafërsisht, po ashtu kemi filluar të shtojmë edhe urat lidhëse të terminalit me aeroplan, nga 8 ura do t’i shtojmë edhe 4 të tjera. Prandaj, do të jemi të gatshëm të presim numrin e udhëtarëve”, tha Gara, përcjell albinfo.ch.