Presidentja Osmani në përvjetorin e Srebrenicës takon deputetin boshnjak

Zyra e Presidences se Kosoves

Presidentja Osmani, në Ditën e Përkujtimit të Gjenocidit në Srebrenicë, ka pritur në takim deputetin Šemsudin Mehmedović dhe një delegacion të përfaqësuesve të komunitetit boshnjak në Kosovë, përfshirë zëvendëskryeministren Emilija Redžepi dhe deputetë të Kuvendit të Republikës.

Osmani ka potencuar se “vuajtjet e popullit boshnjak në këtë ditë të trishtë ndahen edhe nga populli i Kosovës, duke theksuar se gjenocidi në Srebrenicë është simbol i tmerrit të krimeve gjenocidale serbe”, duke kujtuar edhe krimet makabre të kryera nga serbët në Kosovë, përcjell albinfo.ch.

Presidentja ka dënuar “çdo përpjekjeje për të mohuar gjenocidin e Srebrenicës, sepse ky mohim ka për qëllim denigrimin e viktimave dhe fshehjen e motiveve të krimeve të kryera”, thuhet në komunikatën e Presidencës.

Në diskutim me deputetin Mehmedović, Presidentja Osmani ka thënë se “koordinimi i përbashkët është tejet i rëndësishëm në këtë periudhë kur tendencat për destabilizim dhe minim të paqes janë në rritje, prandaj në këtë drejtim, ka vlerësuar edhe kontributin e jashtëzakonshëm të komunitetit boshnjak në Kosovë si urë ndërlidhëse e këtij koordinimi”, përcjell albinfo.ch.