Kryediplomati i BE-së mirëpret pajtimin për shtensionim të situatës

Shefi i diplomacisë evropiane, Josep Borrell, ka thënë se pret hapa të mëtejmë pozitivë.

Pajtueshmëria e Kosovës me BE-në për hapat e parë rreth shtensionimit të situatës në veri të Kosovës është mirëpritur nga shefi i diplomacisë evropiane, Josep Borrell.

Ai ka thënë se pret hapa të mëtejmë pozitivë.

“E mirëpres përkushtimin e Kosovës ndaj marrëveshjes që arritëm në hapat e parë për shtensionim. Presim që Kosova të ndërmarrë hapa të mëtejshëm pozitivë dhe të vazhdojë të përparojë në këtë drejtim”, ka shkruar Borrell në “Twitter”, transmeton Albinfo.ch.

Ai tutje ka thënë se puna me palët do të vazhdojë në kuadër të dialogut për normalizimin e raporteve nga i deleguari i posaçëm i BE-së për dialogun, Miroslav Lajçak.

Qeveria e Kosovës dhe BE-ja u dakorduan të hënën për hapat rreth shtensionimit të situatës në veri, marrëveshje e cila u bë publike nga ekzekutivi kosovar një ditë më pas.

Ky dakordim parasheh katër hapa, të cilat përfshijnë një zvogëlim të menjëhershëm për 25% të pranisë së policisë në dhe rreth ndërtesave komunale në veri./Albinfo.ch

---