Veteranët e luftës i kërkojnë presidentes të mos e dekretojë ligjin që i përjashton ata

Zyra e Presidentes se Kosoves

Gjatë së martës, organizatat e dala nga lufta kanë takuar Presidenten e Kosovës, Vjosa Osmanin.

Ata i kanë paraqitur asaj kërkesat e tyre, në mesin e të cilave edhe mos dekretimi i ligjit për pagën minimale që i përjashton ata.

Derisa, nëse dekretohet ky ligj, veteranët paralajmëruan protesta dhe bllokim të deputetëve për të kryer punën e tyre.

“Edhe në përputhje me ligjet që zbatohen, ne do t’i shfrytëzojmë rrugët ligjore. Do ta kundërshtojmë edhe me protestë, do t’i bllokojmë deputetët që të mos futen në Kuvend. Këto aktivitete s’i bëjmë për një pagë, por këtu po shkelet dinjiteti i kësaj kategorie, i luftës së UÇK-së, janë shkelur institucionet dhe sikur kjo Qeveri s’do ta dijë rrugën si kemi ardhur deri këtu”, ka thënë Xhavit Jashari, përcjell albinfo.ch.

Ndërkohë, Presidentja Vjosa Osmani i ka garantuar organizatat e dala nga lufta se do e analizojë zyra e saj këtë ligj.

“Në takim me përfaqësuesit e organizatave të dala nga lufta e UÇK-së, Presidentja Osmani i ka njoftuar ata se Ligji për Pagën Minimale ende ndodhet në Kuvend dhe sapo të vjen në Presidencë do të trajtohet nga ana e ekspertëve ligjorë në Presidencë dhe në përputhje me kompetencat kushtetuese të institucionit të Presidencës. Sipas Presidentes Osmani, ky Ligj do të analizohet nga Zyra e Presidentes dhe më pas do të veprohet në përputhje me përgjegjësitë kushtetuese e ligjore të Presidentes dhe duke pasur parasysh rëndësinë e trajtimit të dinjitetshëm të këtyre kategorive”, thuhet në njoftimin e Presidencës, përcjell albinfo.ch.