A do të mbahen në Zvicër Lojërat Olimpike

(KEYSTONE/Walter Bieri)

Në Zvicër po diskutohet shumë mundësia e mbajtës së Lojërave Olimpike, përcjell albinfo.ch.

Shumë qeveritarë, e po ashtu edhe analistë janë shprehur kundër mbajtjes së këtyre lojërave në shtetin e tyre, për arsye të ndryshme.

Mirëpo në qëndrimin e fundit ministrja e Sportit, Viola Amherd, është pro organizimit të Lojërave Olimpike Dimërore në Zvicër në të ardhmen. Sipas një zëdhënësi, ajo do të ishte e gatshme të presë ngjarjen sportive ndërkombëtare në një mënyrë të qëndrueshme dhe të përshtatur për Zvicrën.

“I yni është një vend që është i apasionuar pas sportit, i cili pret shumë ngjarje të mëdha kombëtare dhe ndërkombëtare”, tha Renato Kalbermatten, kreu i komunikimit në Departamentin Federal të Mbrojtjes, Mbrojtjes Civile dhe Sportit të premten.

“Këshilltarja federale është e bindur se një ngjarje e madhe ndërkombëtare mund të ketë implikime pozitive dhe të qëndrueshme, si në fushën sociale, ashtu edhe në atë ekonomike”, shtoi ai. Megjithatë, për momentin nuk ka asnjë informacion apo vendim zyrtar për kandidaturën e mundshme zvicerane.

Zvicra në 35 vjetët e fundit ka tentuar 8 herë të fitojë eventin prestigjioz, por nuk ia ka dalë kurrë. Vendi deri tani ka organizuar Lojërat Olimpike Dimërore në dy raste dhe gjithmonë në St. Moritz: në vitin 1928 dhe, për herë të fundit, më 1948.