Vdes dëshmitari i Gjykatës Speciale në rastin e krerëve të UÇK-së

Një dëshmitar, që ishte i regjistruar si viktimë e krimeve të luftës në rastin e krerëve të Ushtrisë Çlirimtare të Kosovës gjatë gjykimit në Hagë, ka vdekur.

Gjykata Speciale ka njoftuar për vdekjen e tij, ku bëhet e ditur se bashkëshortja e viktimës është pranuar të jetë pjesë e procedurave të mëtejshme që do të zhvillohen në Hagë.

“Më 15 shkurt 2023, Trupi Gjykues pranoi kërkesën e V131/06 për të marrë pjesë si viktimë në këtë procedurë. Më 6 qershor 2023, avokati i viktimave njoftoi Panelin për vdekjen e V131/06, dhe paraqiti një kërkesë për të lejuar bashkëshorten e V131/06 të marrë pjesë në procedura. Në mbështetje të këtij interpretimi është neni 22 (3) i ligjit, i cili parashikon se viktimat kanë të drejtën e njoftimit, njohjes dhe dëmshpërblimit. Siç është vënë në dukje nga gjyqtari i procedurës paraprake, e drejta e njohjes kërkon që të njihet dëmi i pësuar nga viktima. Për të garantuar efektivitetin e kësaj të drejte, të afërmit e viktimave të vdekura ose individë të lidhur ngushtë mund të marrin pjesë në vend të tyre nëse plotësohen parametrat specifikë”, thuhet në vendim, përcjell albinfo.ch.