I riu kosovar aplikoi në 37 universitete, pranohet në të gjitha

Një i ri shqiptar që jeton në Gjermani ka konkurruar në 37 universitete të mjekësisë, dhe në të gjitha u pranua. Përkundër kësaj, Bleron Hajdari zgjodhi që shkollimin ta kryejë në qytetin ku jeton, në Frankfurt të Gjermanisë.

Ky 18-vjeçar që e përfundoi gjimnazin me notë maksimale 1.0, e ka menduar edhe specializimin që do të kryejë, pas 6 vitesh studime, raporton Klan Kosova, përcjell Albinfo.ch.

“Tash po mendoj me ndjekë ortopedinë dhe kirurgjinë, sepse më pëlqen me punu me sport edhe babi jem është tu punu si ortoped, andaj ky është drejtimi i mjekësisë që e kam pa deri tash më së shumti dhe më është dok më interesant”, deklaroi Hajdari.

Ai tha se synimet i kishte të qarta rreth asaj që dëshironte të arrinte, dhe ia doli me punë e disiplinë. E për sukseset e të riut shkruajtën edhe gazetat gjermane.

“Kam marrë pjesë në gara të historisë, matematikës dhe biologjisë, kam dal i suksesshëm në ato lëndë, e për historinë kam mundur të fitojë një çmim nga Ministri i Kulturës i Republikës së Esenit, e për atë kanë nis me shkru gazetarët”, pohoi tutje ai.

Krenar për të arriturat e Bleronit shprehet babai i tij, që vjen nga Skenderaj e i cili po ashtu vepron në fushën e mjekësisë, ku si ortoped punon në Gjermani tash e 30 vjet.

“Është një fëmijë shume i urtë, i sjellshëm, e i disiplinuar, derisa si pikë plotësuese që e ka zgjedhë rrugën e mjekësisë më bën të ndjehem mirë, megjithëse unë nuk ju kam përzi, ka qenë zgjedhja e tij”, tha Muharrem Hajdari.

18-vjeçari do të marrë pjesë në një garë të filozofisë pas një jave, e pastaj do të nis përgatitjet për fakultet./Albinfo.ch/