Sveçla: Palët e përfshira në konflikt kanë dhjetëra vepra penale

Ministri i Punëve të Brendshme në Kosovës, Xhelal Sveçla ka reaguar pas rastit të mesnatës së të premtës në një nga lokalet e Prishtinës, ku u vra një person dhe mbetën 17 të tjerë të plagosur.

“Në qendër të kryeqytetit, shtetasit tanë janë të rrezikuar për shkak të kriminelëve që nuk po ndëshkohen nga drejtësia. Ata duke u ndjerë të plotfuqishëm përballë ligjit nuk hezitojnë që hesapet e tyre kriminale t’i zgjidhin me armë e atë në lokale publike në prezencë dhe duke rrezikuar dhjetëra të rinj të tjerë. Palët e përfshira në konflikt kanë me dhjetëra vepra të mëhershme penale. Kur lëngon drejtësia, situatat e ngjashme janë të pashmangshme!”, ka shkruar Sveçla, përcjell albinfo.ch.

Ai ka paralajmëruar edhe themelimin e një taskforce që do të kryejë këto lloj hetimesh.

“Ministria e Brendshme në kuadër të strategjisë kundër krimit të organizuar do të inicojë themelimin e një taskforce për hetimin e thellë, jo vetëm të këtij rasti, por edhe të rasteve të tjera të ngjashme!”, është shprehur tutje Sveçla, përcjell albinfo.ch.