80 raste me meningjit në Kosovë

Drejtori i Klinikës Infektive në Qendren Klinike Universitare të Kosovës, Arben Vishaj, ka deklaruar se muaji korrik ka pasur një rritje të ndjeshme të personave të paraqitur me meningjit.

Vishaj thotë se numri i pacientëve ka arritur deri 48 për spitalizim, kryesisht nga mosha pediatrike.

“Aktualisht në Klinikën Infektive janë duke u trajtuar me meningjit akut gjithsej tetë pacientë, dy nga këta pacientë janë mosha pediatrike me meningjit viral dhe gjashtë me meningjit bakteror. Nga fillimi i viti 2023 e deri në qershor janë spitalizuar gjithsej 38 pacientë me meningjit. Nga muaji korrik e deri më sot kemi pasur një rritje të ndjeshme të kërkesës për spitalizim me meningjit viral te moshat pediatrike, gjithsej 43 pacientë. Kjo rritje ka karakter sezonal dhe është evidente edhe krahasuar me vitin paraprak”, tha Vishaj, përcjell albinfo.ch.

Po ashtu, ai tha se infeksioni meningjit kërkon vëmendje të shtuar te popullata, derisa shtoi se Klinika Infektive në Prishtinë ka kapacitet të mjaftueshëm për trajtimin e pacientëve me meningjit, shkruan Kosovapress.

“Kemi pasur edhe 20 pacientë të tjerë të moshave adulte, të cilët janë trajtuar me formën e meningjitit bakterior. Kjo rritje e pranisë së infeksionit me meningiit viral që është prezente, kërkon vëmendje të shtuar te popullata në përgjithësi dhe respektim rigoroz të rekomandimeve të IKSHPK-së dhe Ministrisë së Shëndetësisë. Klinika Infektive e mbështetur nga SHSKUK-uja ka kapacitetet e nevojshme për trajtim cilësor të meningjiteve në përgjithësi”, ka shtuar Vishaj për KosovaPress, përcjell albinfo.ch.