56 të vdekur për shtatë muaj nga aksidentet në Kosovë

pixabay

Nga janari deri në korrik të 2023-ës në Kosovë janë regjistruar 12,555 aksidente trafiku, nga të cilat 51 kanë qenë me fatalitet, ku 56 persona kanë humbur jetën.

Policia ka bërë të ditur se numri i aksidenteve gjatë periudhës së njëjtë të vitit 2022 ka qenë më i ulët, me 11,551 aksidente.

Sipas statistikave numri i aksidenteve me fatalitet ka qenë më i madh, sipas Policisë gjatë periudhës janar-korrik të viti 2022, 63 persona kanë mbetur të vdekur nga 54 aksidente me fatalitet, raportoi Ekonomia Online.

Njohësit e sigurisë thonë se kjo ndodh më së shumti për shkak të mospërshtatjes së shpejtësisë dhe respektimit të rregullave nga ana e ngasësve.

“Bazuar në kohën në të cilën ne jemi duke marrë këto shifra zyrtare nga ana e policisë së Kosovës e dëshmon faktin që kemi një fluks më të madh të veturave në rrugët e Kosovës, kjo është për faktin se kemi shumë mërgimtarë, të cilët kanë ardhur për t’i kaluar pushimet dhe kjo është si rezultat i asaj se rruga dhe infrastruktura përkatëse në Kosovë nuk mund t’i kapërdijë një fluks të tillë, një numër kaq të madh të veturave. Si pasojë kemi edhe mospërshtatje dhe respektim të rregullave të komunikacionit, të cilat vijnë si shkaktarë i dehjeve apo veprimeve të tjera të pamatura të ngasësve të automjetit”, tha Drizan Shala, përcjell albinfo.ch.