Fushatën e Serbisë kundër Kosovës, BE-ja e sheh si “koment”

Nuk komentojmë mbi komente, shprehet Peter Stano

Zëdhënësi i Bashkimit Evropian për Politikë të Jashtme, Peter Stano, e ka parë si koment fushatën kundër Kosovës, të cilën e ka intensifikuar ditëve të fundit presidenti i Serbisë, Aleksandar Vuçiq.

Stano në një përgjigje ndaj pyetjeve të KOHËS ka thënë se “rregull të përgjithshëm e kanë të mos komentojnë mbi komente”.

“Si rregull e përgjithshëm ne nuk komentojmë mbi komentet. Ne e kemi bërë mjaft të qartë qëndrimin tonë gjatë ditëve e javëve të fundit dhe nuk ka asgjë të re që duam të shtojmë në këtë fazë”, ka thënë Stano, përcjell albinfo.ch.

Presidenti i Serbisë, Vuçiq, disa ditë më parë në një takim në Hungari me liderin hungarez, Viktor Orban, la të kuptohet se nuk do të ketë marrëdhënie të mira me shtetet që e kanë njohur pavarësinë e Kosovës.

Stano ndërkohë për KOHËN ka thënë se është esenciale që palët t’i kthehen dialogut dhe të implementojnë shpejt Marrëveshjen bazë pa vonesa të mëtutjeshme.

“Ka një pritje të qartë nga ana e BE-së nga palët që të marrin hapa shumë mirë të përcaktuar për depërshkallëzim. Është esenciale që dialogu i lehtësuar nga BE-ja, i drejtuar nga Përfaqësuesi i Lartë, dhe implementimi i shpejtë i Marrëveshjes për Rrugën drejt Normalizimit të Marrëdhënieve dhe Aneksit të zbatimit, të vazhdojnë pa vonesa të mëtutjeshme”, ka thënë Stano, përcjell albinfo.ch.

 

---