Escobar: Korrupsioni, problem i madh në Ballkanin Perëndimor

I dërguari i posaçëm i Shteteve të Bashkuara të Amerikës për Ballkanin Perëndimor, Gabriel Escobar, konsideron se korrupsioni është një problem madhor në këtë rajon, ndërsa u shpreh se  Washingtoni dëshiron ta shohë rrugën evropiane të hapur për të gjitha vendet e Ballkanit Perëndimor, përcjell albinfo.ch.

“Korrupsioni është një problem i madh në gjithë rajonin. Jam i lumtur të shoh se gjatë procesit të anëtarësimit fokusi është në sundimin e ligjit si kusht për anëtarësim në BE”, tha ai.

Ai u shpreh se ka edhe një arsye tjetër pse Shtetet e Bashkuara të Amerikës duan të shohin të gjithë rajonin në Bashkimin Evropian.

“Çdo vend që u bashkua me BE-në është më i qëndrueshëm, më i avancuar dhe më i drejtë për sa i përket drejtësisë për qytetarët e tij. Kjo është një arsye tjetër pse duam t’ju shohim në rrugën e anëtarësimit në BE”, deklaroi ai.

Ndër të tjera, në një intervistë për portalin maqedonas 360 Gradë, Escobar tha se së shpejti edhe disa persona nga Maqedonia e Veriut do të sanksionohen nga Shtetet e Bashkuara të Amerikës.

“Administrata e Presidentit Biden është e përkushtuar në luftën kundër korrupsionit, sepse ai përfaqëson korozion për shoqërinë. Nuk mund të shpallim sanksione, por të jeni të sigurt se do të ketë masa”, ka thënë ai.