Kurti takon emisarin e BE-së për dialogun, Miroslav Lajçak

Pas takimit me Lord Stuart Peach, Kryeministri i Republikës së Kosovës, Albin Kurti, takoi edhe Përfaqësuesin Special të Bashkimit Evropian për Dialogun Kosovë-Serbi dhe çështje të tjera rajonale të Ballkanit Perëndimor, Miroslav Lajçak.

Diskutuan për procesin e dialogut dhe rëndësinë e zbatimit të plotë të Marrëveshjes Bazike dhe Aneksit të saj pa kushtëzime

Kryeministri tha në dritën e fjalimit të presidentit të Këshillit Evropian për integrim të Ballkanit Perëndimor në Bashkimin Evropian deri në vitin 2030 është e rëndësishme që të ketë avancim drejt normalizimit të plotë, me njohje reciproke.

Në lidhje me situatën në katër komunat në veri të Kosovës, Kryeministri kujtoi që tashmë kemi një situatë të deeskaluar, e cila nuk duhet të rieskalohet. Kosova tashmë është duke punuar në legjislacionin dytësor për zgjedhjet e hershme, të cilave duhet t’u prijë një kampanjë e hapur, pa frikësime dhe shantazhe, e pasuar me zgjedhje të lira e demokratike.

Me Lajçakun Kryeministri diskutoi edhe për mundësitë për një takim të radhës të nivelit të lartë në Bruksel gjatë shtatorit.