OKB-ja pret vizitën e presidentit ukrainas

Keystone (AP Photo/Efrem Lukatsky)

Presidenti ukrainas, Volodymyr Zelenskyy, pritet të marrë pjesë në debatin e përgjithshëm në Asamblenë e Përgjithshme të OKB-së në New York, në mes të shtatorit. Ambasadori shqiptar në OKB, Ferit Hoxha, ka bërë të ditur se Zelenskyy ka caktuar tashmë një datë për një takim me Sekretarin e Përgjithshëm të OKB-së, Antonio Guterres.

Kreu i shtetit do të marrë pjesë gjithashtu në një seancë të Këshillit të Sigurimit të OKB-së për luftën në Ukrainë, teksa Shqipëria mban presidencën e Këshillit prej 15 anëtarësh në shtator, shkruan DW, përcjell albinfo.ch.

Vizita në selinë e Kombeve të Bashkuara në New York pritet të tërheqë vëmendje të madhe. Vitin e kaluar Zelenskyy bëri një vizitë të shkurtër në Shtetet e Bashkuara të Amerikës, ku takoi aleatin e tij më të rëndësishëm, presidentin amerikan, Joe Biden.