Eksperti gjerman për Ballkanin: Duhet bërë marrëveshje për deeskalim të përhershëm në veri të Kosovës

Bodo Weber, ekspert për Ballkanin dhe bashkëpunëtori i lartë i Këshillit për Politikat e Demokratizimit në Berlin, ka kritikuar qasjen e kohëve të fundit të Perëndimit dhe Bashkimit Evropian për zhvillimet në Kosovë, sidomos për veriun.

Sipas tij, zhvillimeve të muajit maj dhe tutje, Perëndimi dhe Bashkimi Evropian duhet të kishin lënë anash marrëveshjet për Kosovën nga fillimi i vitit dhe të gjenin një marrëveshje për deeskalim të përhershëm në veri të Kosovës.

Ai u shpreh se ajo marrëveshje do të duhej të përfshinte dhe kthimin e serbëve në institucione, përcjell albinfo.ch.

“Për mendimin tim, ajo marrëveshje do të përfshinte edhe kthimin e serbëve në institucione, përmes zgjedhjeve për kryetarë komunash dhe këshilla komunale, që do të ishte gjithashtu një mënyrë për t’u kthyer në polici dhe gjyqësor”, ka thënë ai për Tanjug.

Sipas tij, mënyra më e shpejtë për rizgjedhje është që kryetarët e komunave në veri të Kosovës të japin dorëheqje.