Zvicra mbështet krijimin e një gjykate speciale për Ukrainën

Ignazio Cassis ka mbështetur thirrjet për një tribunali për "krimet e agresionit" rus në Ukrainë

Ministri i Jashtëm zviceran, Ignazio Cassis, ka mbështetur thirrjet në rritje në OKB për ngritjen e një tribunali për të hetuar “krimet e agresionit” rus në Ukrainë, përcjell albinfo.ch.

Zvicra mbështet idenë e një gjykate speciale për krimin e agresionit kundër Ukrainës, deklaroi të martën në Nju-Jork ministri i Jashtëm zviceran, Ignazio Cassis. Ai mori pjesë në një shkëmbim në Gjykatën Penale Ndërkombëtare (ICC), në margjinat e Asamblesë së Përgjithshme të OKB-së.

ICC ka lëshuar një urdhër arresti për presidentin rus, Vladimir Putin, për “deportimin e paligjshëm” të mijëra fëmijëve ukrainas që nga pushtimi i Ukrainës në shkurt 2022, por nuk ka juridiksion për të hetuar krimin e agresionit në Ukrainë. Kjo është arsyeja pse në mesin e diplomatëve po qarkullon ideja për ngritjen e një gjykate speciale të OKB-së.

Cassis saktësoi se një gjykatë e tillë speciale duhet të krijohet brenda kornizës shumëpalëshe dhe me mbështetje të balancuar ndërkombëtare.

Presidenti zviceran, Alain Berset, kishte kritikuar më herët Rusinë në fjalimin e tij në Asamblenë e Përgjithshme të OKB-së. “Duke nisur një luftë agresioni kundër Ukrainës, Federata Ruse jo vetëm që ka sulmuar një vend paqësor, por edhe ligjin ndërkombëtar dhe multilateralizmin”, tha ai.

Kreu i Departamentit Federal të Brendshëm shprehu keqardhjen që ky agresion ishte vepër e një anëtari të përhershëm të Këshillit të Sigurimit të OKB-së, organ i cili, sipas statutit të Kombeve të Bashkuara, është “përgjegjës për ruajtjen e paqes botërore dhe sigurisë ndërkombëtare”.

Presidenti ukrainas, Volodymyr Zelensky, do t’i drejtohet Këshillit të Sigurimit të OKB-së të mërkurën për herë të parë që nga fillimi i luftës. Takimi po zhvillohet në nivelin më të lartë dhe pritet të flasin shumë liderë.

 

 

---