Diskutime rreth shitjes së djathit zviceran ‘Gruyere’

Zvicrës i kërkohet të mbrojë produktet e saj të shitura jashtë vendit

Në vitin 2021 prodhuesit zviceranë të Gruyere i kërkuan një gjykate amerikane që ta caktonte këtë djathë si produkt të Zvicrës, por gjyqtarët refuzuan ta bëjnë këtë, duke argumentuar se në Amerikë ‘gruyere’ është një etiketë e zakonshme për djathin, pavarësisht se ku prodhohet, përcjell albinfo.ch.

Në funksion të këtij vendimi, Këshilli Kombëtar miratoi këtë javë një mocion, ku thuhet se Zvicra duhet të mbrojë më mirë produktet e saj në vendet e huaja, me të cilat ka marrëveshje tregtare.

“Ky vendim vjen pas një beteje ligjore midis Interprofession du Gruyère dhe një organizate amerikane aktive në fushën e prodhimit dhe marketingut të produkteve të qumështit”, sipas deputetit Jacques Nicolet, i cili drejtoi mocionin.

“Si rezultat, amerikanët do të jenë në gjendje të vazhdojnë të prodhojnë dhe të shesin djathin e tyre me emrin “Gruyère”. Kjo situatë është e papranueshme dhe kërkon një reagim të prerë nga qeveria”.

Tani çështja po kalon në Këshillin e Shteteve.

 

---