Kurti: Bëhet fjalë për një formacion terrorist e kriminal që ka planifikuar gjatë këtë sulm

Kryeministri i Kosovës, Albin Kurti, ka deklaruar se grupi i cili ka sulmuar sot është i përkrahur politikisht e financiarisht nga Beogradi zyrtar, teksa sipas tij, bëhet fjalë për një formacion terrorist e kriminal.

“Procesi në vijim do të na japë më shumë të dhëna se kush janë këta, si hynë në Kosovë dhe kush ka dhënë urdhër. Çfarë kemi mësuar, është që bëhet fjalë për një formacion terrorist e kriminal që ka planifikuar gjatë këtë sulm. Ata nuk paraqesin një bandë të kontrabandës, por një strukturë mercenare që është e përkrahur politikisht e financiarisht nga Beogradi zyrtar”, ka thënë ai.

Ndryshe, ai ka njoftuar se në Samadrexhë ka takuar gruan e policit të vrarë dhe tre fëmijët e tij.

“Falënderoj të gjithë qytetarët që kanë ardhur këtu për të bërë nderime për policin e vrarë. Urojmë që ky të jetë rasti i fundit, në rrugën e vështirë për ligj dhe drejtësi”, ka thënë ai.