Autoriteti zviceran i kontrollit miraton vaksinën e përditësuar të Covid-19 nga Moderna

(AP Photo/Nam Y. Huh)

Autoriteti zviceran i kontrollit, Swissmedic, i ka dhënë miratimin e plotë të tregut për vaksinën Spikevax XBB.1.5, ka njoftuar përmes një deklarate kompania farmaceutike Moderna, shkruan 20min.ch.

Sipas njoftimit nga autoriteti, miratimi bazohet në të dhënat e provës klinike nga Moderna, të cilat tregojnë se vaksina e përditësuar çon në përgjigje të forta imune kundër disa varianteve, duke përfshirë ato përgjegjëse për mbi 70 për qind të rasteve aktuale në Zvicër.

Vaksina Spikevax mbron kundër këtyre varianteve

Në muajin shtator, kompania ndau të dhëna shtesë të provës klinike që Swissmedic ka thënë se konfirmuan që vaksina e përditësuar prodhon gjithashtu një përgjigje imune kundër variantit BA.2.86, që të dhënat e mbikëqyrjes sugjerojnë se mund të jetë në rritje në Zvicër, përcjell albinfo.ch.

“Aprovimi i vaksinës sonë të përditësuar për COVID-19 nga Swissmedic është i rëndësishëm pasi po vëzhgojmë transmetimin në rritje të SARS-CoV-2 në Zvicër në fillim të periudhës së vjeshtës dhe dimrit”, thuhet në njoftim.

Kompania farmaceutike deri më tani ka marrë miratime për vaksinën e saj të përditësuar për COVID-19 në Shtetet e Bashkuara të Amerikës, Kanada, Bashkimit Evropian dhe Mbretërisë së Bashkuar dhe ka paraqitur aplikime për miratim në mbarë botën.