Zvicra miraton sanksionet e BE-së kundër industrisë iraniane të dronëve

Zvicra po shtrëngon sanksionet e saj kundër industrisë iraniane të dronëve në lidhje me luftën në Ukrainë teksa po miraton sanksionet që Bashkimi Evropian ka vendosur në muajin korrik.

Shitja, shpërndarja, eksporti dhe tranziti i komponentëve të përdorur për ndërtimin dhe prodhimin e dronëve tani janë të ndaluara, sipas ministrive të ekonomisë dhe mbrojtjes, shkruan swissinfo.

Në takimin e sotëm, qeveria zvicerane vendosi t’i bashkohet sanksioneve më të ashpra të Bashkimit Evropian, përcjell albinfo.ch.

Masat do të zbatohen nga sot në orën 18:00 teksa sanksionet financiare dhe të udhëtimit janë planifikuar gjithashtu kundër individëve dhe organizatave të lidhura me mbështetjen për programin iranian të dronëve.

Me këtë vendim, qeveria po vazhdon partneritetin e ngushtë me Bashkimin Evropian në fushën e sanksioneve.

Ndryshe, sanksionet e BE-së në lidhje me dërgimin e dronëve iranianë në Rusi janë zbatuar nga Zvicra që nga vjeshta 2022.