Presidenti zviceran thekson nevojën për stabilitet në Ballkan

(KEYSTONE/Marcel Bieri)

Para takimit të Komunitetit Politik Evropian në Granada të Spanjës, presidenti i Zvicrës, Alain Berset, ka thënë se një situatë e qëndrueshme në Ballkan është e rëndësishme për Zvicrën.

Javët e fundit, Berset ka zhvilluar bisedime me presidentin serb, Aleksandar Vuçiq dhe me kryeministrin e Kosovës, Albin Kurti, teksa në margjinat e samitit të Granadës janë planifikuar edhe përpjekje për ndërmjetësim diplomatik ndërmjet Serbisë dhe Kosovës, shkruan swissinfo.

Presidenti zviceran theksoi gjithashtu rëndësinë e samiteve të tilla për mbajtjen e kontakteve me krerët e tjerë të shteteve dhe qeverive evropiane.

Ai ka planifikuar një sërë takimesh dypalëshe dhe po përpiqet sa më shumë të flasë me secilën prej tyre. Ky është samiti i vetëm në Evropë, në të cilin Zvicra është ftuar në nivel të shefit të shtetit dhe qeverisë, përcjell albinfo.ch.