Kosova nënshkruan marrëveshje me Zvicrën në vlerë afro 9 milionë euro për ujërat

Zvicra mbështet Kosovën në trajtimin e ndikimeve të ndryshimeve klimatike në sektorin e ujit

Zvicra vazhdon të mbështesë Qeverinë e Kosovës në trajtimin e ndikimeve të ndryshimeve klimatike në sektorin e ujit, shkruan albinfo.ch.

Ministri i Financave, Punës dhe Transfereve, z. Hekuran Murati, dhe ai zviceran, Chargé d’Affaires a.i., z. Christoph Fuchs, nënshkruan projekt-marrëveshje mbi 8 milionë euro për përmirësimin e qëndrueshmërisë klimatike të ujësjellësve në Kosovë.

Në njoftimin e ministrisë thuhet se ky projekt adreson forcimin e kapaciteteve të Kompanive Rajonale të Ujit në ofrimin e shërbimeve të ujit dhe ujërave të zeza, e në mënyrë specifike reduktimin e ujit të pafaturuar, efikasitetin e energjisë dhe përdorimin e energjisë së ripërtëritshme.“Tutje, projekti i ujërave adreson rritjen e performancës operacionale të KRU-ve, e cila pastaj kontribuon në ofrimin e shërbimeve më të mira e me cilësi të lartë për qytetarët, si dhe përmirësimin e qëndrueshmërisë financiare për KRU-të.

”Ministri Hekuran Murati ka falënderuar ambasadorin e ngarkuar në detyrë, Christoph Fuchs, për bashkëpunimin e vazhdueshëm me Qeverinë zvicrane në projekte zhvillimore, e në veçanti në sektorin e ujërave. Ndërsa, Fuchs u shpreh mirënjohës për bashkëpunimin e deritanishëm me Qeverinë e Kosovës në sektorin e ujërave, ku edhe theksoi se projekti në fjalë ka ardhur si rezultat i projekteve të mëparshme e mësimeve të nxjerra në sektorin e ujit. “Qeveria e Republikës së Kosovës mbetet e përkushtuar në investime strategjike në fusha me interes të veçantë për vendin, në linjë me Strategjinë Shtetërore të Ujërave”.

 

 

---