Osmani: Dialogu nuk do vazhdojë njëjtë si para 24 shtatorit

Vjosa Osmani, Presidente e Kosoves

Presidentja e Kosovës, Vjosa Osmani, është shprehur se Kosova ka dëshmuar qartë që Serbia qëndron prapa sulmit të 24 shtatorit.

“E para ka të bëjë me financimin e këtyre strukturave për të cilat ka dëshmi të evidentuara. E dyta ka të bëjë me armët, e treta ka të bëjë me trajnimet të cilat tash as shteti serb nuk i mohon dhe e katërta ka të bëjë me involvimin dhe lidhjet politike të shtetit serb me terroristët që kanë udhëhequr me këtë sulm. Shtetet anëtarë mund t’i kenë procedurat për konfirmim të këtyre informacioneve. Është koha për reflektim sepse qasja përgjatë këtyre 12 vjetëve e ka inkurajuar Vuçiqin të përdorë dhunë”, ka thënë ajo në konferencë për media.

Ajo po ashtu komentoi mbi mundësinë e masave ndëshkuese për Serbinë.

“Një numër i shteteve anëtare kanë dhënë sinjale pozitive që janë duke e shqyrtuar një gjë të tillë. Me të gjitha këto argumente do të ishte dëm për paqen dhe dialogun nëse nuk do të merreshin masa ndaj Serbisë”, ka thënë ajo, përcjell albinfo.ch.