ASK kërkon shtyrjen e afatit për regjistrimin e popullsisë në Kosovë

Agjencia e Statistikave të Kosovës ka njoftuar se nuk është përgatitur për procesin e regjistrimit të popullsisë ta nisë më 1 nëntor. Në një raportim në komisionin e Kuvendit të Kosovës, ushtruesi i detyrës së kryeshefit të ASK-së, Ilir Berisha, thotë se ka mangësi në përgatitje të procesit.

“Sfidat janë mungesa e tabletave, mungesa e mbikëqyrësve të procesit dhe mostrajnimi i mbikëqyrësve”, ka thënë ai në Komisionin për Buxhet, ku po raporton para deputetëve, përcjell albinfo.ch.

Ndërkohë ai është pyetur nga deputeti Avdullah Hoti se nëse ia vlen të fillohet me një nëntor procesi i regjistrimit të popullsisë, në përgjigjen e tij kryeshefi thotë se do të provojnë që në mesin e dhjetorit të fillohet regjistrimi.

“Do të bëjmë përpjekje maksimale që ta përfundojmë më 15 dhjetor”, ka thënë Berisha.

Qeveria me vendimin e fundit pati vendosur që procesi i regjistrimit të popullsisë të nisë më 1 nëntor dhe të zgjasë deri më 15 dhjetor.