Zëvendëskryeministri pret në takim ambasadorin e ri austriak

Zëvendëskryeministri i parë për Integrim Evropian, Zhvillim dhe Dialog i Kosovës, Besnik Bislimi, ka pritur sot Ambasadorin e ri të Austrisë në Kosovë, George Schnetzer, të cilit i uroi mirëseardhje.

Përmes një komunikate, Bislimi në takim ka folur për marrëdhëniet e shkëlqyera ndërmjet dy shteteve dhe falënderoi Austrinë për mbështetjen e vazhdueshme për Kosovën, përcjell albinfo.at.

“Zëvendëskryeministri Bislimi foli dhe mbi bashkëpunimin e frytshëm me ish-ambasadorin e Austrisë në Kosovë, Christoph Weidinger, e kontributin e tij, dhe i ofroi ambasadorit të ri George Schnetzer bashkëpunim të afërt në thellim të mëtejmë të raporteve ndërmjet Kosovës dhe Austrisë”, thuhet në komunikatë.

Ndër të tjera, u tha se mes temave të diskutuara përgjatë takimit ishte dhe rrugëtimi i Kosovës drejt integrimit evropian, ku zëvendëskryeministri Bislimi theksoi se vendi është i përgatitur institucionalisht dhe i gatshëm për hapa të rëndësishëm tutje drejt integrimit në Bashkimin Evropian, teksa u shpreh se Republika e Kosovës e mirëpret planin e ri për zgjerim, përfshirë parimin që procesi duhet të jetë i bazuar në meritokraci.