Seanca e Kuvendit të Shqipërisë mbyllet mes tymit e karrigeve të përmbysura

Seanca e ditës së sotme në Kuvend është shoqëruar me tensione të shumta. Deputetët e opozitës fillimisht bllokuan foltoren me karrige, ndërsa më pas deputeti Ervin Salianji hodhi tymuese blu në sallë, përcjell albinfo.ch.

Pavarësisht rrëmujës së shkaktuar brenda sallës, pikat në rendin e ditës kaluan pa diskutim, direkt në votim. E ndërsa ajri rëndohej nga tymueset e hedhura nga deputeti Salianji, Lindita Nikolla lexoi të gjitha pikat të cilat u miratuan nga deputetët e mazhorancës.

Deputeti Sali Berisha duket se pati probleme me frymëmarrjen, ai u largua për pak minuta nga salla, por u rikthye sërish.

Kujtojmë se deputetët e opozitës së Kuvendit të Shqipërisë kanë krijuar kaos pa nisur seanca e paraparë për të enjten. Raportohet se ka pasur përplasje mes ligjvënësve demokratë dhe punonjësve të Gardës, të cilët kanë rrethuar ambientet e Parlamentit.

Deputeti demokrat, Ervin Salianji, ka vijuar të bllokojë foltoren e Kuvendit. Teksa fjala i është dhënë ministrit Taulant Balla, ai ka zgjedhur që të ndezë një flakadan.

Nga pamjet e publikuara në rrjete sociale nga ish-kryeministri Sali Berisha, shihet se ligjvënësit demokratë kanë përmbysur karriget përpara foltores së Kuvendit.

Edhe në mbërritjen përpara Parlamentit, Berisha paralajmëroi se këtë të enjte nuk do të ketë një seancë plenare normale në parlamentin e Shqipërisë.