Vuçiq i cilëson gënjeshtra pretendimet se ai do të nënshkruajë njohjen e Kosovës

EPA/ANDREJ CUKIC

Presidenti serb, Aleksandar Vuçiq, i ka cilësuar si gënjeshtra pretendimet se ai është i gatshëm ta nënshkruajë pavarësinë e Kosovës.

Këtë e ka bërë të ditur përmes një video-mesazhi të publikuar në llogarinë e tij në rrjetin social “Instagram”.

“Nuk do ta nënshkruaj kurrë pavarësinë e Kosovës, ndërsa i përgëzoj të gjithë ata në skenën politike të Serbisë që thonë gënjeshtra të tilla”, ka thënë ai, përcjell albinfo.ch.

Në një reagim ndaj akuzave të disa partive opozitare, ai ka këmbëngulur se “gjithmonë do t’i përmbahet Kushtetutës” së Serbisë.

Ndryshe, partitë e krahut të djathtë në Serbi e kundërshtojnë Marrëveshjen e Ohrit dhe kanë kërkuar vazhdimisht ndërprerjen e negociatave për normalizimin e marrëdhënieve që Serbia dhe Kosova po i zhvillojnë nën ndërmjetësimin e Bashkimit Evropian.