Ministri i Brendshëm i Kosovës: Zyrtarët policorë dhe rekrutët do të trajtohen me prioritet në spitale

Foto FB: Xhelal Sveçla

Ministri i Punëve të Brendshme i Kosovës, Xhelal Sveçla, ka njoftuar se pjesëtarët e Policisë së Kosovës do të trajtohen me prioritet në spitalet e Kosovës.

Përmes një postimi në rrjetin social “Facebook”, ai e ka prezantuar arritjen e një marrëveshjeje mes Shërbimit Spitalor Klinik dhe Universitar të Kosovës dhe Policisë së Kosovës, për “mbështetje të kualifikuar për kontrollet shëndetësore” të zyrtarëve policorë, përcjell albinfo.ch.

“Sot është nënshkruar marrëveshje bashkëpunimi mes Drejtorit të SHSKUK-së, Elvir Azizi dhe Drejtorit të Përgjithshëm të Policisë, Gazmend Hoxha, përmes së cilës personelit policor dhe rekrutëve do t’u ofrohen me prioritet dhe pa pagesë shërbimet mjekësore, psikologjike dhe specialistike të nivelit dytësor dhe tretësor në SHSKUK dhe në të gjitha spitalet rajonale. Në këtë marrëveshje që ka në fokus dhënien e shërbimeve me prioritizim për personelin policor, i është dhënë rëndësi e veçantë dhe shëndetit të gruas në Policinë e Kosovës, përmes kryerjes së kontrolleve në zbulimin e hershëm të sëmundjeve si kanceri i gjirit dhe kanceri i qafës së mitrës, analizave specifike hormonale etj”, ka shkruar ai.

Sipas tij, zbatueshmëria e kësaj marrëveshje do të garantohet përmes zyrtarëve policë që do të vendosen si pika referuese për zyrtarët policorë në SHSKUK dhe spitale rajonale.