Festat e fundvitit po afrohen, Prishtina gati për dekorim, kaq do t’i kushtojë

Kuvendi i Komunës së Prishtinës e ka nënshkruar dje kontratën për dekorimin e kryeqytetit për festat e fundvitit, përcjell albinfo.ch.

Referuar njoftimit të publikuar në e-Prokurimi, kjo do t’i kushtojë komunës 35 mijë e 400 euro. Tenderi i është dhënë kompanisë “Finesë Design SH.P.K”.

Kohëzgjatja e kësaj kontrate është 70 ditë dhe parasheh dekorimin e shesheve të kryeqytetit.

Aty përfshihet edhe dekorimi i shtëpizave në bulevardin “Xhorxh Bush”.

Kontrata është nënshkruar më 6 nëntor, derisa për këtë tender ishin paraparë 50 mijë euro.

“Dekorimi i shtepizave te Tregut Dimeror, të Komunës së Prishtinës në bulevardin Xhorxh Bush, me ndriçim led dhe simbolin e Tregut Dimëror. Logo e Vere N’Dimer në shtëpiza, nga materiali forex me dimensione 30cm x 60cm, e veshur me ndriçim dekorativ. Vërejtje: Në çmim duhet të llogaritet dekorimi me ndriçim led dhe po ashtu simboli – Logo e Tregut dimëror në bazë të dizajnit të propozuar nga OE fitues“, thuhet në dosje.