Britani: 300 mijë grave do t’u ofrohet ilaç për reduktimin e rrezikut të kancerit të gjirit

Pothuajse 300 000 grave do t’u ofrohet një ilaç për të reduktuar rrezikun e zhvillimit të kancerit të gjirit, njoftoi ditë më parë Shërbimi Shëndetësor Kombëtar anglez. (NHS).

Rreth 289 000 gra pas menopauzës në Angli, të cilat mendohet se kanë një rrezik të moderuar ose të lartë të kancerit të gjirit, do t’u ofrohet anastrozole në një përpjekje për të parandaluar zhvillimin e sëmundjes.

Provat kanë treguar se ilaçi redukton rastet e kancerit të gjirit me 49% gjatë 11 viteve në mesin e grave të kualifikuara.

Zyrtarët kanë vlerësuar se nëse 25% e grave të kualifikuara në Angli e pranojnë ofertën, dhe gjysma e tyre e marrin ilaçin për pesë vitet e rekomanduara, atëherë do të parandalohen 2 000 raste të zhvillimit të kancerit të gjirit.

Shkencëtarët kanë zbuluar se përveç trajtimit të kancerit të gjirit, anastrozoli, një terapi hormonale, gjithashtu mund të parandalojë rastet e kancerit të gjirit, transmeton dpa përcjell albinfo.ch.

Ilaçi zakonisht përdoret për të trajtuar kancerin e gjirit, por është “ripërdorur” për të parandaluar gjithashtu rastet.

Ky është ilaçi i parë që kalon përmes Programit të Ripërdorimit të Barnave të NHS në Angli.

Anastrozoli u rekomandua për herë të parë si një opsion parandalues nga Institutit Kombëtar për Përsosmërinë e Shëndetit dhe Kujdesit (NICE), në vitin 2017, megjithatë, me trajtimin e palicensuar në këtë përdorim, përvetësimi ka mbetur i ulët.