Alarmi për riorganizim sulmi, Kurti kërkon nga KFOR-i, EULEX-i dhe BE-ja ta dënojnë Serbinë e Radojiçiqin

Keystone EPA/GEORGI LICOVSKI

Kryeministri i Kosovës, Albin Kurti, ka kërkuar nga KFOR-i, EULEX-i dhe Bashkimi Evropian që përmes një raporti, zyrtarisht të marrin masa ndaj kërcënimeve serbe, dhe t’ia atribojnë zyrtarisht Serbisë aktin e agresionit dhe krimin ndaj Kosovës, përcjell albinfo.ch.

Këtë reagim Kurti e ka shprehur përmes një postimi në rrjetin social “Facebook”, pasi ka ngritur alarmin se Milan Radojiçiq po riorganizon grupin për një sulm tjetër terrorist.

”U bënë pesë muaj pas rrëmbimit në Leposaviq të policëve tanë kufitarë Rifat Zeka, Beqir Sefa e Shemë Mustafa dhe tetë javë nga vrasja e rreshterit të Policisë së Kosovës, Afrim Bunjaku. KFOR-i, EULEX-i dhe BE-ja duhet të dalin me raport publik e zyrtar, ku ia atribuojnë Serbisë aktin e agresionit dhe krimin e terrorizmit, dhe ku dënohet riorganizimi i grupit të Radoiçiqit. Edhe pas presionit ndërkombëtar, Serbia ende nuk ka tërhequr të gjitha trupat dhe artilerinë nga afërsia e territorit të Kosovës”, ka shkruar ai.