“Koreja e Veriut mund të kryejë provë bërthamore vitin e ardhshëm”

Agjencia e spiunazhit të Koresë së Jugut ka deklaruar se Koreja e Veriut mund të kryejë një provë bërthamore vitin e ardhshëm, ndërsa u tha se Pheniani mori ndihmë nga Rusia për të nisur me sukses një satelit zbulues këtë javë.

Sipas raportimeve nga mediat ndërkombëtare, anëtari i Komitetit parlamentar të inteligjencës jugkoreane, Yoo Sang-bum, pas informimit nga agjencia e spiunazhit, ka thënë se Koreja e Veriut i dërgoi Rusisë të dhëna për dy raketat që i dështuan më parë dhe Moska ofroi analizën e saj të të dhënave.

Një tjetër anëtar i komitetit, Youn Kun-youngt, u shpreh se lëshimi ishte i suksesshëm dhe sateliti hyri në orbitën e Tokës, teksa Koreja e Veriut mund të lëshojë satelitë shtesë dhe të kryejë provë bërthamore vitin e ardhshëm.

Ndryshe, hera e fundit që Koreja e Veriut testoi një bombë bërthamore ishte në vitin 2017, në një objekt që u shpërthye përpara bisedimeve midis presidentit të SHBA-së, Donald Trump dhe udhëheqësit të Koresë së Veriut, Kim Jong Un.

Ky veprim do të thotë se Seuli do të rrisë mbikëqyrjen përgjatë kufirit të fortifikuar verior.