Ish-kryeministri i Kosovës: Shtyrja e regjistrimit të popullsisë sjell pasoja

Foto: Facebook

Ish-kryeministri i Kosovës, Avdullah Hoti, ka thënë që shtyrja e regjistrimit të popullsisë mund të sjellë shumë pasoja, teksa i ka listuar disa prej tyre, shkruan albinfo.ch.

“Regjistrimi i popullsisë është bazë për vendimmarrje të sektorit publik sa u përket: përfaqësimit të barabartë, shpërndarjes të drejtë të të mirave dhe shërbimeve publike, planifikimit të duhur të shërbimeve arsimore, shëndetësore, infrastrukturore, të sigurisë etj. Në sektorin privat, të dhënat nga regjistrimi i popullsisë janë jetike për planifikim të biznesit, të investimeve dhe të rrjetit të përgjithshëm të ofertës”, ka shkruar ai në rrjetin social “Facebook”.

Tutje në këtë postim, ai i ka listuar disa prej pasojave të mundshme në rast të shtyrjes së regjistrimit të popullsisë.

“1. Nuk sigurohet shpërndarje efektive e buxhetit/burimeve për shkolla, spitale, infrastrukturë dhe shërbime të tjera publike pasi numri i popullsisë është bazë për planifikimin sektorial të shpenzimeve buxhetore dhe grantit qeveritar për komuna. Disa komuna nuk marrin mbështetjen e duhur dhe, rrjedhimisht, nuk mund të ofrojnë shërbime në mënyrë efektive.

2. Nuk mund të bëhet planifikim i saktë për vendimmarrrje efektive nga ana e bizneseve lidhur me investimet, tregjet dhe strategjitë e biznesit.

3. Është e pamundur të hartohen programe sociale dhe të ofrohet mbështetje adekuate për grupet në nevojë.

4. Rrezikohet besueshmëria e të dhënave të tjera, përfshirë edhe Produktin e Brendshëm Bruto për kokë banori. Për më tepër, duke pasur parasysh se të dhënat nga regjistrimi shërbejnë për përcaktimin e mostrave për anketimet e shumta që bën Agjencia e Statistikave gjatë vitit, atëherë mostrat mund të mos jenë përfaqësuese e popullacionit përkatës dhe, rrjedhimisht, të dhënat për buxhetet familjare, për tregun e punës, për konsumin e të tjera, mund të mos jenë të sakta.

5. Pamundësohet krahasimi i trendeve në Kosovë dhe vendet e tjera, përfshirë edhe ndikimin negativ në planifikimin e BE-së dhe donatorëve të tjerë për mbështetje për Kosovën”, ka shkruar ai.