Kryediplomatja belge: Dialogu është mënyra për paqe afatgjate me Serbinë

Sot, ministrja e Jashtme e Belgjikës, Hadja Lahbib, pas takimit me homologen e saj kosovare, Donika Gërvalla, tha se në diskutimin e tyre çështje thelbësore ishte tema për dialogun Kosovë-Serbi, përcjell albinfo.ch.

Ministrja Lahbib tha se përkundër përparimit që është arritur deri tani, meqë tensionet vazhdojnë të jenë të larta, dialogu është e vetmja rrugë për paqe afatgjate.

“Dialogu mes Prishtinës dhe Beogradit ka qenë tema thelbësore, të cilën e kam ngritur edhe dje në Beograd. Të njëjtën porosi do të përçoj edhe këtu. Është bërë një përparim i rëndësishëm në normalizimin e marrëdhënieve, sidoqoftë tensionet janë ende të larta. Vetëm me dialog mund të arrihet. Përgjigjja që po e kërkojmë është deeskalimi dhe një përkushtim për procesin e normalizimit. Kjo është e vetmja mënyrë për të gjetur një paqe afatgjate dhe që do t’u japë të dyja palëve një të ardhme të integrimit në BE”.

Ajo tha se Kosova dhe Belgjika duhet të rrinë krah njëra-tjetrës në sfidat aktuale.