Dorasi thotë se u pagua 30 mijë € nga Naim Murseli për vrasjen e gruas së tij

Vrasja e Liridona Murselit, shkon në tre numri i personave të arrestuar

Naim Murseli, Granit Plava dhe Kushtrim Kokalla, janë arrestuar mbrëmë si të dyshuar për vrasjen e Liridona Ademajt, raportojnë mediat vendase, përcjell albinfo.ch.

Murseli, i cili është bashkëshorti i të ndjerës, dyshohet se kishte porositur vrasjen, që ishte ekzekutuar nga Plava, në këmbim të shumës prej 30 mijë eurosh.

Plava, ashtu sikurse Murseli, e ka pranuar fajësinë para hetuesve, ndërsa ende nuk dihen detaje rreth dëshmisë së dhënë pse bashkëshorti porositi vrasjen e gruas dhe e inskenoi atë si grabitje.

I arrestuari i tretë është Kushtrim Kokalla. Ky i fundit dyshohet se është pjesëtar i Forcës së Sigurisë së Kosovës, i cili sipas mediave vendase, është nipi i Murselit.

Liridona u vra pasditen e së mërkurës në makinë, në afërsi të shtëpisë së saj, në dalje të Prishtinës. Fillimisht ngjarja u raportua si grabitje, derisa policia arrestoi bashkëshortin e viktimës, por shumë detaje të tjera pritet të dalin në dritë.

 

---