“Nuk ka paqe pa sigurinë e grave”, protesta pas vrasjes së Liridona Murselit

Ka nisur protesta në sheshin “Zahir Pajaziti” në Prishtinë, në mbrojtje të grave pas rastit të fundit të vrasjes së Liridona Murselit, ngjarje që dyshohet se u porosit nga bashkëshorti i saj, Naim Murseli.

Kolektivi për Mendim dhe Veprim Feminist ka organizuar protestën, të cilën po e quajnë “gjithëpopullore”.

“Ju njoftojmë se këtë të martë, më 5 dhjetor, duke filluar nga ora 18:00, ne thërrasim protestë gjithëpopullore në sheshin “Zahir Pajaziti” në Prishtinë. Thërrasim në organizim dhe veprim të gjitha/ë anembanë Kosovës që të mblidhemi dhe të themi njëzëri që nuk ka paqe pa sigurinë e grave dhe të kërkojmë që dhuna e gjinizuar dhe femicidi të trajtohen si urgjencë kombëtare”, thuhet në njoftimin e tyre.

Liridona Murseli u vra të mërkurën në një inskenim si grabitje që dyshohet se u porosit nga bashkëshorti i saj. Për rastin, përveç Naim Murselit, janë arrestuar edhe dy të tjerë, njëri prej të cilëve dyshohet të jetë dorasi, përcjell albinfo.ch.