Arrestohen dy persona, njëri zyrtar i ATK-së, për shpëlarjen e 1 milion eurove

Policia e Kosovës ka njoftuar se ka arrestuar dy persona në Mitrovicë, njëri prej tyre zyrtar i Administratës Tatimore të Kosovës, të cilët dyshohen se në bashkëpunim kanë kryer veprat penale “Shpëlarje e parave” dhe “Keqpërdorim i pozitës apo autoritetit”.

Referuar Policisë, vlera e parave që dyshohet se janë shpëlarë përmes bizneseve fiktive është mbi 1 milion euro.

Veprat dyshohet se janë kryer gjatë viteve 2019-2023.

Me vendim të prokurorit, pas intervistimit të dyshuarit janë liruar në procedurë të rregullt.

“SHPËLARJE E PARAVE & KEQPËRDORIM I POZITËS APO AUTORITETIT – Mitrovicë 2019-2023. Janë arrestuar dy të dyshuar, meshkuj kosovarë, (njëri zyrtar i ATK-së), të cilët dyshohen që në bashkëpunim kanë kryer veprat në fjalë. Vlera e parave të cilat dyshohet që janë shpëlarë përmes bizneseve fiktive është mbi 1, 000.000 (një milion) €. Me vendim të prokurorit, pas intervistimit, të dyshuarit janë liruar në procedurë të rregullt. Rasti po hetohet”, thuhet në raportin 24 orësh.