Zjarr në një spital të Italisë, 3 viktima, evakuohen 200 pacientë

Tre persona kanë humbur jetën në Tivoli të Italisë, pasi spitali i qytetit u përfshi nga flakët. Mediat në Itali raportojnë se dy persona humbën jetën nga intoksikimi, kurse një i tretë si pasojë e atakut në zemër, përcjell albinfo.ch.

Pas shuarjes së flakëve, spitali u mbush me tym dhe u evakuuan rreth 200 pacientë, të cilët tashmë janë transferuar.

Dhjetëra pacientë të evakuuar u transferuan në palestrën bashkiake aty pranë, të ngritur nga Mbrojtja Civile lokale me batanije, jastëkë dhe shtretër, shkroi kryetari i Bashkisë së Tivolit, Giuseppe Proietti, në rrjetet sociale.

Zjarri në spitalin e Tivolit, sipas mediave, nisi nga disa dhoma që ndodhen në katin -2 të spitalit dhe prej andej flakët mbërritën në urgjencë dhe në reanimacion.

Repartet e tjera nuk u prekën, por tymi shumë i dendur pushtoi gjithë spitalin dhe u pa e nevojshme që të evakuohej e gjithë struktura.

Përveç tri viktimave që humbën jetën nga zjarri, u gjet edhe trupi i një personi që kishte ndërruar jetë para se të binte zjarri.