Sa më e shtrenjtë do të jetë jeta në rajonin tuaj të Zvicrës në vitin 2024?

Viti i Ri, rritje të reja çmimesh. Çfarë lloj rritjesh mund të prisni në pjesën tuaj të Zvicrës — dhe pse?

Ndërsa disa mallra dhe shërbime të konsumit në të vërtetë do të bëhen pak më të lira në vitin 2024, kostoja e shumicës, për fat të keq, do të rritet, përcjell albinfo.ch.

Arsyet kryesore për këtë janë rritja e çmimeve të primeve të sigurimit shëndetësor, energjisë elektrike dhe qirave.

Por rritjet nuk do të jenë uniforme në gjithë Zvicrën. Ato do të ndryshojnë sipas kantonit dhe komunitetit, sepse kostot e të tre shërbimeve të përmendura më sipër janë të ndryshme në varësi të vendbanimit tuaj.

Platforma e lajmeve Watson ka llogaritur rritjet që mund të prisni në rajonin tuaj bazuar në të dhënat zyrtare.

Kjo është sa do të paguani çdo muaj në kantonin ose komunën tuaj.

Cyrih

Mesatarisht ju do të paguani 8,15 franga më shumë për energjinë elektrike, 191,40 më shumë për qiranë dhe 29,1 për sigurimin shëndetësor.

Kjo do të thotë që fatura juaj mujore vetëm për këto shërbime do të jetë 227,66 franga më shumë në vitin 2024.

Këto janë mesataret në qytetin e Cyrihut. Nëse jetoni në komunitete afër, rritja juaj do të ulet paksa.

Gjenevë

Fatura mesatare e energjisë elektrike do të rritet me 15,13 franga, qiraja me 87,27 dhe primi i sigurimit shëndetësor me 46,1.

Rritja totale mujore: 148.51 franga.

Bazel-City

Energjia elektrike do të rritet me 8,04 franga në muaj, qiraja me 78,38 dhe primet e shëndetësisë me 30,1, në total 116,52 në muaj.

Vaud

Ky kanton është i ndarë në zona të shumta tarifore, ndaj le të shohim kryeqytetin e tij Lozanën, ku jetojnë shumica e banorëve të huaj.

Norma e energjisë elektrike do të rritet me 15,19 franga, qiratë me 39,2 dhe sigurimet shëndetësore me 39,4.

Rritja totale mujore do të shkojë në 93.79 franga.

Rritje të tjera çmimesh

Rritjet e mësipërme janë llogaritur vetëm për tarifat e energjisë elektrike, qirave dhe sigurimit shëndetësor.

Por prisni të paguani më shumë edhe për transportin publik.

Nga 10 dhjetori, kur nis orari i ri i trenave në Zvicër, do të hyjnë në fuqi edhe tarifat e reja (më të larta).

Për herë të parë në shtatë vjet, çmimi i GA Travelcards – abonimet vjetore që u japin udhëtarëve akses në hekurudhat publike zvicerane, autobusët e postës, shërbimet e anijeve publike, si dhe transportin lokal urban në autobusë dhe tramvaje – do të rritet me rreth 4.3 për qind.

 

---