Vendbanimi zviceran në të cilin nuk mund të jetohet më

Rrëshqitjet e dheut, shkak i pabanueshmërisë së tij

Zona e shkatërruar nga dy rrëshqitje dheu në fund të gushtit në Schwanden nuk do të jetë më e banueshme.

Shtëpitë në zonën e rrezikuar që u kursyen nga rrëshqitjet do të prishen, teksa autoritetet e justifikuan vendimin në bazë të një harte të re rreziku, sipas swissinfo.

Një rrëshqitje e mëtejshme dheu në këtë zonë “të kuqe” mund të ketë pasoja fatale, tha Hansruedi Forrer, kryebashkiaku i Komunës së South Glarus. Si rrjedhojë, autoriteti vendor është detyruar të urdhërojë prishjen e objekteve të mbetura në zonë, të cilat gjithashtu do të jenë të ndaluara në të ardhmen.

Bisedimet me pronarët e ndërtesave në fjalë do të zhvillohen gjatë dy javëve të ardhshme. Urdhrat përfundimtare të evakuimit do t’u dërgohen atyre në fund të janarit dhe secili apelim do t’i drejtohet qeverisë së Glarus, përcjell albinfo.ch.

Në fund të gushtit, gjashtë shtëpi u varrosën ose u shkatërruan, por askush nuk u lëndua dhe rreth njëqind njerëz u evakuuan.

---