Një metër borë në Brezovicë

Borë e madhe në Brezovicë, policia ka një njoftim të rëndësishëm

Gjendja në Brezovicë është e keqe për shkak të reshjeve të shumta të borës, ku edhe janë bërë disa rekomandime që të shmanget vizita në këtë qendër skijimi.

Sipas “Brezovica.info”,  bora ka arritur deri në një metër, duke bllokuar kështu parkingun, ndërsa vetëm një korsi e rrugës mbetet e hapur.

“Pas reshjeve të mëdha të borës në Qendrën e Skijimit në Brezovicë është shumë keq, ka 1 metër borë, vetëm një korsi e rrugës është pastruar, parkingu është i bllokuar. Rekomandim që komuniteti i skijimit të mos vijë sot në Brezovicë”, bëhet e ditur në njoftim.

Në pamjet që janë publikuar, shihet se disa vetura kanë mbetur të bllokuara.

“Ju njoftojmë se për shkak të reshjeve të dendura të borës që ka mbuluar atë zonë, është vështirësuar qarkullimi i automjeteve dhe në ora 10:15 është mbyllur tërësisht për qarkullim rruga nga Brezovica në drejtim të Qendrës së Skijimit, deri në pastrimin e rrugës nga kompania për pastrimin e rrugëve. Policia e stacionit të Shtërpcës dhe Njësia Rajonale e Komunikacionit është në Brezovicë dhe po orienton komunikacionin. Nga zyrtarët e Qendrës së Skijimit jemi njoftuar gjithashtu se sot nuk ka kushte për skijim“, shkruan zëdhënësi i Policisë së Kosovës për Rajonin e Ferizajt, Kanun Veseli.

 

---