Haxhiu-Isufajt: Po të mos hiqej fletarresti më 2021, ndoshta nuk do të kishte Banjskë 2023

Ministrja e Drejtësisë në Kosovë, Albulena Haxhiu, ka reaguar përsëri në lidhje me deklarimin e Kryeprokurort të Prokurorisë Speciale të Kosovës, Blerim Isufajt, i cili gjatë ditës së djeshme ka deklaruar se kishte dhënë pëlqimin për heqjen e urdhërarrestit të Milan Radoiçiqit në vitin 2021, përcjell albinfo.ch.

Përmes një postimi në rrjetin social “Facebook”, Haxhiu ka kërkuar nga Isufaj që në vend të reagimeve ndaj deklaratave të tyre, të përgjigjet pse u tërhoq urdhërarresti për Radoiçiqin.

“Në vend të reagimeve kundrejt deklarimeve tona, Blerim Isufaj le të përgjigjet vetëm në pyetjen pse u tërhoq urdhërarresti për kryekriminelin Radojçiq në vitin 2021? Po të mos hiqej fletarresti më 2021, ndoshta nuk do të kishte Bajnskë 2023. Të mos tentojë të ikë nga thelbi i çështjes!”, ka shkruar ajo.