Serbia njeh targat e Republikës së Kosovës, ka filluar zbatimi i vendimit

Vendimi për lëvizjen e lirë të të gjitha automjeteve me targa të Republikës së Kosovës nëpër territorin e Serbisë ka filluar të zbatohet këtë të hënë.

Pak pas orës 08:00, në pikën kufitare në Jarinje ka kaluar vetura e parë e pasagjerëve pa afishe në simbolet shtetërore, shkruajnë mediat serbe.

Në të gjitha pikat kufitare mes Kosovës dhe Serbisë, mbrëmë janë postuar deklarata për anulimin e afisheve në zonën e Serbisë qendrore për automjetet me targa RKS.

Serbia javë më parë ka marrë vendim për njohjen e targave të Republikës së Kosovës, ndërkohë që Kryeministri i Kosovës, Albin Kurti, ka njoftuar se Kosova do të marrë të njëjtin vendim pasi të sigurohet se Serbia po zbaton vendimin për njohje të targave.

Ky vendim nënkupton që nëpër territorin e Serbisë do të mund të qarkullojnë automjetet me targat RKS.