Mbi 7 mijë qytetarë aplikuan për pasaportë brenda dy ditësh në Kosovë

EPA/VALDRIN XHEMAJ

Agjencia për Regjistrim Civil (ARC) ka njoftuar se këto dy ditë të janarit, numri i qytetarëve që kanë kërkuar të pajisen me pasaportë ka shkuar në 7 mijë e 400.

Kryeshefi ekzekutiv i ARC-së, Blerim Camaj, ka thënë për Ekonomia Online se gjatë vitit 2023 janë pajisur rreth 300 mijë qytetarë, ndërsa vetëm në muajin dhjetor ky institucion i ka lëshuar më shumë se 30 mijë pasaporta.

“Vetëm në këto ditë të janarit do të thotë më 3 dhe 4 janar është dikun rreth 7400 qytetarë që kanë aplikuar. 4 mijë kanë apliku më datën 3 janar, ndërsa 3400 më datën 4 janar”, ka deklaruar Camaj.

“Gjatë vitit 2023 diku rreth 300 mijë qytetarë të Republikës së Kosovës janë pajisur me pasaporta. Ndërsa në muajin dhjetor (2-23) shihet një rritje më e madhe. Kështu që në muajin dhjetor i kemi dikund mbi 36 mijë pasaporta të lëshuara”, u shpreh Camaj.

Camaj ka thënë se interesimi i qytetarëve serbë për t’u pajisur me pasaporta është në rritje, por nuk ka dhënë shifra.

“Sistemi nuk i ndan në serbë e shqiptarë, por në komunat me shumicë serbe, edhe atje janë në rritje kërkesat”, u shpreh ai./Ekonomia Online