Qeveria spanjolle konfirmon njohjen e pasaportës së Kosovës

Të shtunën zëvendëskryeministri i Kosovës, Besnik Bislimi, njoftoi se Spanja i ka njohur pasaportat e Kosovës.

Të dielën qeveria spanjolle ka njoftuar se njeh pasaportën kosovare, shkruan gazeta spanjolle “El Pais”.

Siç shkruan gazeta, në vendimin e Ministrisë së Jashtme spanjolle theksohet se ky vendim vjen pasi më 1 janar hyri në fuqi lëvizja e lirë, pa viza për kosovarët. Por, kjo sipas MPJ-së së Spanjës, nuk nënkupton njohjen e shtetit të Kosovës, gjë që nga mediat atje kjo po shihet si paradoks.

Disa herë ministri i Jashtëm, Jose Manuel Albares, kishte theksuar se “Spanja ka qëndrim mosnjohës ndaj Kosovës” sa i përket pasaportës dhe pavarësisë.

Spanja është në mesin e pesë shteteve të Bashkimit Evropian që nuk e njohin pavarësinë e Kosovës, e ku bëjnë pjesë edhe Greqia, Qiproja, Sllovakia dhe Rumania.

Megjithatë, të gjitha këto shtete njohin dokumentet e udhëtimit të lëshuara nga autoritetet në Kosovë./ El Pais.