Komisioni Evropian po e përcjell nga afër rastijn Sanduloviq

Komisioni Evropian është duke e përcjellë nga afër rastin e keqtrajtimit dhe të paraburgimit të opozitarit serb, Nikola Sanduloviq.

Në një përgjigje për KOHËN, zëdhënësja e Komisionit, Ana Pisonero, ka thënë se janë në kontakt me autoritetet përkatëse.

“Kemi parë raportime në lidhje me paraburgimin dhe keqtrajtimin e supozuar të Sanduloviq. Po e ndjekim nga afër këtë rast dhe jemi në kontakt me autoritetet përkatëse dhe palët e interesuara. Është e rëndësishme të kemi qartësi të plotë të fakteve rreth këtij rasti. Presim që të drejtat e të gjithë qytetarëve të respektohen. Çdo ndalim duhet të bazohet në dyshimin e arsyeshëm për kryerjen e një vepre penale dhe çdo pretendim i besueshëm për dhunë duhet të ndiqet efektivisht nga autoritetet kompetente”, ka deklaruar Pisonero.

Sanduloviqit i është caktuar masa e paraburgimi prej një muaji nga Gjykata e Lartë në Nish. Në arsyetimin e gjykatës thuhet se Sanduloviq është arrestuar për veprën penale nxitje të urrejtjes kombëtare, racore e fetare.

Politikani opozitar serb është rrahur brutalisht nga policia sekrete serbe, në ndërtesën e BIA-s ditë më parë. Sipas familjes dhe avokatit të tij, arsyeja ishte një postim i tij në X duke bërë homazhe te varrezat e familjes Jashari në Prekaz, duke thënë se është i vetmi politikan nga Serbia që nderoi viktimat e pafajshme shqiptare./Koha.net