SHBA: Është koha që Izraeli të zvogëlojë intensitetin e ofensivës ushtarake në Gazë

Keystone (AP Photo/Fatima Shbair)

Zëdhënësi i Këshillit të Sigurisë Kombëtare të Shtëpisë së Bardhë, John Kirby, ka deklaruar se SHBA-ja ka thënë se “është koha e duhur” që Izraeli të zvogëlojë intensitetin e ofensivës së tij ushtarake në Gazë, koment ky i cili thuhet se shfaqi dallimet në rritje midis aleatëve amerikanë dhe izraelitë.

Sipas tij, SHBA-ja ka diskutuar me Izraelin “për një kalim në operacione me intensitet më të ulët”, përcjell albinfo.ch.

“Ne besojmë se është koha e duhur për atë tranzicion. Dhe ne po flasim me izraelitët për ta bërë këtë”, tha Kirby.

Në anën tjetër, një ditë më parë kryeministri izraelit, Benjamin Netanyahu, ka deklaruar se lufta kundër Hamasit do të vazhdojë deri në “fitore totale”.

“Ne do të vazhdojmë luftën derisa të arrijmë të gjitha qëllimet tona, si eliminimin e Hamasit, kthimin e pengjeve, dhe sigurimin që Gaza nuk do të përbëjë më kurrë rrezik për Izraelin”, është shprehur Netanyahu, shkruajnë mediat e huaja.