Mbi 200 studentë nga Kosova mund të studiojnë në universitetet hungareze vitin tjetër akademik

Foto FB: Ministria e Arsimit, Shkencës, Teknologjisë dhe Inovacionit

Ministria e Arsimit, Shkencës, Kulturës dhe Inovacionit në Kosovë ka nënshkruar sot Memorandum Bashkëpunimi me Ministrinë e Punëve të Jashtme dhe Tregtisë së Hungarisë, për Programin e Bursave Stipendium Hungaricum, për vitet 2024–2026.

Sipas marrëveshjes, 225 studentë nga Kosova do të kenë mundësi të studiojnë në universitete prestigjioze hungareze duke nisur nga viti akademik 2024/2025, transmeton albinfo.ch.

“Qëllimi i këtij Memorandumi është të lehtësojë dhe të zgjerojë bashkëpunimin ndërmjet dy vendeve, duke kontribuar kështu, në një bashkëpunim reciprokisht të dobishëm në fushën e arsimit të lartë”, thuhet në njoftim.

Tutje njoftimi bën të ditur se ambasadori i Hungarisë, Bela Boszik, ka falënderuar ministren për gatishmërinë e saj për të thelluar bashkëpunimin dhe u zotua për bashkëpunim më të gjerë në fushën e arsimit.

Ndryshe, në kuadër të këtij programi, Hungaria do të ofrojë çdo vit 75 bursa Bachelor, Master, dhe PhD për studentët kosovarë që duan të studiojnë në universitetet hungareze në drejtimet Bujqësi, Shkenca Shoqërore, Shkenca Natyrore, Arte dhe Shkenca të Humanizmit, Art dhe Dizajn etj.